Rabu, 12 Oktober 2016

PROFESSORES HUSI ESCOLA CATÓLICA DIOCESE MALIANA TUIR FORMAÇÃO IHA SALÃO SAGRADO CORAÇÃO DE JESUS MALIANA, NE’EBE PREZIDI HUSI EKIPA DIOCESE DARWIN DURANTE LORON RUA


Professor besik atus ida (100) husi Eskola católica Diocese Maliana, Municipio Covalima, Liquiça & Bobonaro partisipa formasaun iha salão Sagrado coração de Jesus durante loron rua (Dia 4 de Outubro  - 5 Outubro 2016). Formasaun ne’e realiza husi Professores Diocese Darwin nian hamutuk 12, topiku ne’ebe sira fahe iha formasaun ne’e maka Jogo literasia, Jogo Matemátika/Numerasaun, Oinsa atu hanorin labarik le’e ho dia’k, Leadership. Jogo sira ne’e barak liu ba Professor sira ne’ebe hanorin Pré-escolar no ensino Básico. Sira fahe partisipantes ne’ebe tuir  formasaun ba grupo 4 atu aprende kona ba jogo sira ne ‘e no ekipa husi Diocese Darwin mos tama hotu iha grupo 4, atu bele fo formasaun ba partisipantes sira, sira halo rotasaun ba jogo  ne’e atu partisipantes husi formasaun ne'e bele aprende hotu. Objetivo husi formasun maka atu halo mestri hotu iha kreatividade, wainhira hanorin iha sala laran tenki uza jogos oi-oin atu anima estudante/Labarik sira,  atu bele iha vontade no kontente atu aprende ho di’ak. “aprendizazem atu liberta  labarik sira aprende duni husi halimar” dehan Professor Jefry husi Diocese Darwin iha nia diskursu.
Partisipantes sira mos sente kontente hodi aprende duni no halo tuir jogo ne’ebe mak fahe husi ekipa Diocese Darwin, maske sira kole tamba tur loron tomak maibe sira iha corazem nafatin atu aprende hotu jogo sira ne’e, maske dalaruma sira ladun akapta diak liafuan balu tamba professores sira husi Diocese Darwin koalia Lian Ingleza maibe iha tradutora nain 4 ne’ebe maka ajuda tradúz ba partisipantes sira.
Professores Diocese Darwin mos sente kontente tamba partisipantes sira iha pasiensia atu aprende jogos hirak ne’e no sira iha vontade di’ak atu bele tuir hotu  programa ne’e to’o remata.
“Obrigada barak tamba iha mestri balu ne’ebe maka dook hanesan Suai maibe sira iha corazem nafatin hodi bele tuir treinamentu ida ne’e. obrigada mos ba imi nia hamnasa midar sira ne’e, Ha'u espera wainhira imi fila husi fatin ida ne'e, bele hala'o imi nia aktividade iha sala laran hodi hanorin labarik sira, hanesan iha ne’e, ami hanorin ita bo’ot atu halimar liu husi imi nia hamnasa, liu husi imi nia esperiensia imi fahe hotu ho ami, ida ne’e mos hanesan lisaun ne’ebe ami aprende husi imi” tenik Prefessor Jefry. Ikus liu sira mos hato’o obrigado no agradese ba ekipa sira ne’ ebe maka organiza buat hotu – hotu ba formasaun durante loron rua.





















REMATA FORMASAUN IHA MOS ATIVIDADE KALAN KULTURA NE’EBE APRESENTA HUSI COLÉGIO INFANTE DE SAGRES MALIANA (COISMA) NO ESCOLA SECUNDÁRIA CATÓLICA AVE MARIA SUAI (ESCAM)
Atu hakmaan kole durante formasaun loron rua ba partisipantes, ekipa Diocese Darwin no ekipa tomak husi Fundação Sagrado Coração de Jesus Maliana (FSCJ), maka kalan ikus husi formasaun ne iha atividade ho naran kalan kultura ne’ebe partispa husi Ekipa Diocese Darwin, Partisipante husi formamasaun loron rua nian, komunidade, estudante no ekipa FSCJ. Aprezentasaun husi atividade ne’e maka hanesan Bidu Likurai, Dansa Kultura, Dansa Modernu no Diskursu husi Estudante ESCAM no Músicas husi COISMA.  Atividade ne’e iha mos liafuan badak Agradesimento husi Prezedenti Pe. Natalin “Uluk nanain Hau agrdese e obrigado barak ba ekipa Diocese Darwin,  ba professor sira, estudante husi COISMA ho ESCAM. Agradese ba ita bo’ot sira nia presence ne ‘ebe tulun tebes professor sira iha ne’e atu bele iha ideia ida dia’k no iha neon ne’ebe luan liu tan atu komprende kona ba sira nia knar.  Amo mos dehan tan katak Diocese Maliana kiik liu husi Diocese Darwin rasik tamba ne’e ho ita bo’ot sira nia prezensa iha ne’e bele tulun ami atu sai bo’ot iha futuro. Ikus liu hodi  Amo Bispo Diocese Maliana Dom Norberto do Amaral nia fatin dala ida tan hau hakarak hato’o  agradese ba Amo Bispo Diocese Darwin Bispo Eugenny no mos ba Sra. Michaela tamba sira bele haruka ita bo’ot sira mai tulun ami iha fatin ida ne’e, hato’o ami nia comprimentos no hakoak bo’ot ba amo Bispo no sra. Michaela no kolea sira iha Diocese Darwin nian.”
Reprezentante husi Ekipa Diocese Darwin nian Sr. Jefry mos hato’o lia fuan badak ba ema hotu katak sira orgulho bo’ot tebes tamba hola parte iha fatin ida ne’e “nu’udar timor oan tenki orgulho tamba imi iha kultura Ida deit, hau admira tamba imi bele rai no lori imi nia kultura ho diak to’o di’ak agora. Iha Australia ami iha kultura ne’ebe oi – oin no barak husi fatin hotu-hotu, maibe buat ne’ebe hau nota iha Darwin ne’e rasik katak imi Timor oan barak ne’ebe mak iha ne’eba sei kaer nafatin imi nia kultura iha ne’eba, tamba ne’e imi tenki orgulho sai timor oan duni”. Nia mos dehan tan katak Ida ne’e hanesan primeira vez ba sira oinsa atu troka cultura husi fatin ida ba fatin seluk. Nia agradese ba ema sira ne’ebe importante tebes ne’ebe maka realiza duni Formasaun iha loron rua hanesan Pe. Natalino ho ekipa tomak, sira ne’ebe maka ajuda translate iha loron rua nia laran, ba mestri sira ne’ebe maka prepara alunos sira atu bele apresenta iha kalan ida ne’e, orgulho bo’ot teb-tebes no previlegio tamba sira bele hare’e buat ne’ebe maka sira nunka hare iha fatin seluk tamba la iha ema ne’ebe atu organiza hanesan ne’e, entaun ne’e hanesan buat ida ne’ebe furak tebes  atu bele sira bele hare’e.
















Tidak ada komentar:

Posting Komentar